Minningardagur um fórnarlömb umferðarslysa
Árleg alþjóðleg minningarathöfn um fórnarlömb umferðarslysa verður haldin við þyrlupall bráðamóttöku Landspítalans í Fossvogi sun. 17. nóvember kl. 14. Sambærilegar athafnir verða haldnar víða um land á vegum Slysavarnarfélagsins Landsbjargar.
Einnar mínútu þögn verður kl. 14:15 og eru allir sem eiga þess kost hvattir til að taka þátt í minningarstundinni. Í ár verður kastljósinu sérstaklega beint að erfiðum aðstæðum aðstandenda eftir umferðarslys. Ása Ottesen flytur ávarp við athöfnina en hún hefur glímt við mikil áföll. Bróðir hennar lést í bílslysi fyrir mörgum árum en móðir hennar slasaðist einnig í því slysi. Systir hennar slasaðist alvarlega í umferðarslysi nýlega og er bundin við hjólastól.
Sú hefð hefur skapast við athöfnina að heiðra starfsstéttir sem sinna björgun og aðhlynningu þegar umferðarslys verður. Þeim eru færðar þakkir fyrir mikilvægt og óeigingjarnt starf þeirra. Gert er ráð fyrir að ein af þyrlum Landhelgisgæslunnar lendi á þyrlupalli bráðamóttökunnar rétt fyrir athöfnina og verður ökutækjum viðbragðsaðila stillt upp við þyrluna. Má þar nefna ökutæki lögreglu, sjúkrabíla, slökkviliðsbíla, björgunarsveitarbíla og fleiri.