Hafdís Hansdóttir hefur verið ráðin framkvæmdastjóri Þjónustu hjá VÍS. Hafdís hefur frá árinu 2000 starfað hjá Arion banka og forverum hans, nú síðast sem svæðisstjóri útibúa á höfuðborgarsvæðinu. Hafdís hefur gengt ýmsum störfum á sínum ferli hjá bankanum sem snúa öll að þjónustu við viðskiptavini, m.a. verið útibússtjóri í Kópavogi, forstöðumaður þjónustuvers og sviðsstjóri þjónustukjarna á Viðskiptabankasviði. Hafdís hefur lokið markþjálfaranámi frá Háskólanum í Reykjavík og rekstrar- og viðskiptanámi hjá Endurmenntunarstofnun Háskóla Íslands. Hún er með BA gráðu í félags- og fjölmiðlafræði frá Háskóla Íslands og meistaragráðu í kvennafræðum frá Lancaster University.

Hafdís Hansdóttir:

,,Ég er full tilhlökkunar að fá þetta tækifæri hjá þessu öfluga félagi. Þjónusta hefur verið mitt hjartans mál nær allan minn starfsferil. Það er gríðarlega mikilvægt að viðskiptavinir VÍS finni að félagið er traust bakland í óvissu lífsins. Að því mun ég vinna alla daga.“

Helgi Bjarnason, forstjóri VÍS:

,,Við erum gríðarlega ánægð með að fá jafn öflugan liðsmann og Hafdís er í okkar hóp. Hún býr yfir yfirgripsmikilli þekkingu og reynslu af þjónustu við viðskiptavini og hefur á síðustu árum helgað sig því að bæta upplifun viðskiptavina. Við ætlum að veita viðskiptavinum okkar framúrskarandi þjónustu, m.a. í gegnum stafrænar dreifileiðir. Hafdís verður mikilvægur hlekkur í þeirri vegferð og frábært að fá hana liðs við okkur.“