Rúmlega þriðjungur þeirra 100 tjónabíla sem VÍS skoðaði dekk hjá í febrúar og mars sl. voru á of slitnum dekkjum. Samkvæmt reglugerð frá 2014 skal dekkjamynstur vera að lágmarki 3 mm að dýpt frá 1. nóvember til og með 14. apríl. Yfir sumartímann er aftur á móti samkvæmt reglugerðinni nægjanlegt að mynstursdýptin sé að lágmarki 1,6 mm.

Þetta er í fimmta sinn sem VÍS gerir könnun sem þessa, síðast árið 2015 en þá voru 65% ökutækja á of slitnum dekkjum. Ánægjulegt er að sjá þessa þróun og má vænta að auknar kröfur reglugerðarinnar skili þessum árangri. Þrátt fyrir þróun í rétta átt er ekki ásættanlegt að enn sé þriðjungur tjónabíla með of litla mynstursdýpt að vetri til.

Hér má sjá aðrar niðurstöður úr könnuninni:

Loftþrýstingur

Réttur loftþrýstingur var einungis í 64% tilfella, sem er svipuð tala og í fyrri könnunum. Þar sem loftþrýstingur var ekki réttur var hann í 18% tilfella mismikill á milli dekkja og í 12% tilvika of lítill. Í þeim tilvikum, sem dekk höfðu laskast í umferðarslysi var þrýstingur ekki kannaður.

Samstaða dekkja

Langflestir bílanna sem voru kannaðir voru með sömu tegund dekkja allan hringinn eða 94%. Það hlutfall hefur aldrei mælst eins gott þau fimm ár sem könnunin hefur verið gerð. Í hinum 6% tilvika var samstaða dekkja að framan og að aftan.

Tegund dekkja

Miður var að sjá að 8% tjónabíla voru á sumardekkjum. Algengast var að bílar væru á negldum dekkjum eða 41% og hefur það hlutfall aldrei verið eins hátt í könnunum VÍS. Ástand og magn nagla var þó mjög mismunandi á milli bíla. 31% ökutækja voru á heilsársdekkjum og þar á eftir komu ónegld vetrardekk.

Þrátt fyrir að enginn mótmæli því að dekk eru mikilvægur öryggisþáttur í umferðinni, er greinilegt að of margir huga ekki að ástandi þeirra. VÍS hvetur alla ökumenn til að yfirfara ástand þeirra dekkja sem þeir ætla að nota í sumar.