Í 60% tilfella óku einn eða fleiri bílstjórar yfir á rauðu ljósi á gatnamótum hjá Olís við Fjallkonuveg í Grafarvogi þegar fylgst var með umferðinni þar nýverið að morgni til. Aðstæður voru ekki góðar, nýtilkomin hálka eftir að götur höfðu verið auðar dagana á undan. Engu að síður fóru nú fleiri yfir á rauðu en í fyrri könnunum VÍS þar sem að meðaltali hefur verið farið yfir á öðru hverju rauðu ljósi. Í hvert skipti fóru einn til þrír ökumenn yfir á rauðu ljósi, því fleiri eftir því sem umferðin jókst.  

umferdweb.jpg
Sex af hverjum tíu óku yfir á rauðu ljósi á gatnamótum hjá Olís við Fjalkonuveg í Grafarvogi.

Á gatnamótum Grensásvegar og Miklubrautar voru ökumenn ekki alveg eins kræfir síðdegis. Samt sem áður var ekið þar gegn rauðu ljósi í annað hvert skipti.

Sekt við því að aka yfir á rauðu er 15.000 kr. ásamt því að viðkomandi fær tvo punkta í ökuferilsskrá sína. Það eru smámunir miðað við þær alvarlegu afleiðingarnar og varanlegt líkamstjón sem þetta athæfi getur haft, bæði fyrir þann sem ekið er á þann sem veldur slysinu. Sök þess sem fer yfir á rauðu er algjör.