Hoppa yfir valmynd
Forvarnir | 07.04.2020

Eftirvagnar

Á sumrin eru margir eftirvagnar í eftirdragi.

Hvað þarf að spá með bílinn?
  • Hversu þungan eftirvagn bíllinn má draga má sjá í skráningarskírteini.
  • Ökumaður hafi réttindi til að draga eftirvagninn. Þeir sem eru með bílpróf tekið eftir 15. ágúst 1997 hafa B réttindi en þá má heildarþyngd bíls og vagns ekki vera meiri en 3.500 kg.
  • Ekki hlaða eftirvagninn svo mikið að hann fari yfir hámarksþyngdina sem bíllinn má draga.
  • Setja dót sem er þungt fyrir miðju í vagninn en ekki allt aftast eða fremst. Þá eru meiri líkur á að vagninn rási sér í lagi þegar keyrt er niður brekkur.
  • Ef eftirvagn byrgir baksýn ökumanns setja upp myndavél eða hliðarspegla á bílinn.
  • Hámarkshraði bíls með skráðan eftirvagn er 90 km/klst.
En hvað með eftirvagninn?
  • Ganga vel frá tengibúnaði eftirvagns við bílinn.
  • Ef bremsuvír er til staðar festa hann við augað við hliðina á króknum annars setja öryggisvírinn þar.
  • Breidd hans má ekki vera meira en 30 sm út fyrir hvora hlið bifreiðar.
  • Láta skoða vagninn annað hvert ár.
  • Vera viss um að ljósin séu öll í lagi.
  • Fara yfir hjólabúnað á vorin með því að tjakka vagninn upp taka á dekkinu.
  • Fara yfir dekk og loftþrýsting þeirra. Ekki er mælt með að nota eldri dekk en 10 ára.
  • Nota þjófavarnabúnað á vagninn svo ekki sé hægt að draga hann burt.
  • Eftirvagnar með heildarþyngd yfir 750 kg eiga að vera búnir hemlum.
  • Ef nauðhemlað er á bíl með ABS hemla sem dregur eftirvagn sem ekki er með þá hemla er hætta á að vagninn fari ekki sömu leið og bíllinn heldur getur eftirvagninn jafnvel lagst meðfram bílnum.
  • Þennan gátlista er gott að styðjast við þegar sumarið er undirbúið.
Eldvarnir
  • Eldvarnir eru nauðsynlegar í eftirvögnum sér í lagi þar sem fastar gaslagnir eru.
  • Slökkvitæki, eldvarnarteppi, reykskynjari og gasskynjari þarf að vera til staðar. Allt er þetta búnaður sem þarf að yfirfara og tryggja að sé í lagi m.a. út frá líftíma.
  • Fylgjast reglulega með gaslögnum og tengingum í vagninum þar sem stöðug hreyfing er í akstri. Láta fagmann yfirfara lagnir og tengi á fimm ára fresti i og skipta út eftir þörfum.
  • Staðsetja sig ekki of nærri næsta aðila á tjaldsvæðinu til að minnka líkur á að eldur berist á milli ef kviknar í.
Eftirvagnar og vindur
  • Eftirvagnar taka á sig mikinn vind og haga þarf akstri í samræmi við það.
  • Kynna sér veðurspá og vindafar áður en lagt er af stað.
  • Ef vindhviður fara í 15 til 25 m/s þá getur vindur haft mikil áhrif á akstur og mikilvægt að endurskoða ferðaplan.
  • Ef það er ekki mögulegt skal draga úr hraða. Ef hvessir enn frekar ber skilyrðislaust að stoppa og leggja upp í vindinn.