Húftrygging fyrir íslensk fiskiskip stærri en 100 brl.

Húftrygging

Bótasvið vegna algers tjóns

Vátryggingin bætir tjón ef:

• Skipið ferst eða verður fyrir svo miklum skemmdum að ekki er unnt að bjarga því eða gera við það eða kostnaður við að bjarga því og gera við það er hærri en vátryggingarfjárhæðin.
• Skipið hefur ekki komið fram þremur mánuðum eftir að síðast spurðist til þess eða áhöfnin hefur yfirgefið skipið og það er ekki komið undir umráð vátryggðs innan þriggja mánaða frá því það var yfirgefið.
• Skipið er hernumið eða kyrrsett af erlendu ríki og ekki látið laust innan sex mánaða. Ákvæði þetta á ekki við um tjón sem hlýst af því að skip er gert upptækt í refsimáli, kyrrsett eða selt að kröfu skuldheimtumanna.

Bótasvið vegna tjóns að hluta

Vátryggingin bætir tjón vegna:

• Skemmda á skipinu sökum skyndilegrar og óvæntrar óhappatilviljunar, nema sérstök undantekning sé gerð í vátryggingarsamningnum, svo og skemmda sem raktar verða til einfalds gáleysis skipverja eða þriðja manns.
• Skemmda sem stafa af því að galli er í efni skipsins, smíðisgalli eða viðgerðargalli á því eða hlutum þess, enda verða skaðabætur ekki fengnar úr hendi þeirra sem ábyrgð kunna að bera á slíkum göllum.
• Kostnaðar við björgun, svo og eðlilegs kostnaðar við ráðstafanir til að varna tjóni, sbr. þó ákvæði siglingalaga um takmörkun ábyrgðar.
• Þátttöku í sameiginlegu sjótjóni eins og slík þátttaka er ákveðin í York-Antwerpen reglunum.
• Kostnaðar sem óhjákvæmilega fylgir tjónsviðgerð, þ.e. starfsmannakostnað, slippkostnað, eyðslu í vélum skipsins, hafnargjöld, gæslu, þóknun til skoðunarmanns flokkunarfélags, svo og þóknun til skoðunarmanns eiganda ef um meiri háttar tjón er að ræða, eins og nánar er ákveðið í niðurjöfnunarreglum í 22 gr. skilmálanna. Þóknun til skoðunarmanns eiganda er háð fyrirfram samþykki félagsins.
• Kostnaðar við förgun muna vegna bótaskylds tjóns.

Vátryggingin bætir ekki:

• Skemmdir á þeim hlutum skipsins sem efnisgalli, smíðisgalli eða viðgerðargalli er á.
• Tjón sem stafar af ófullnægjandi viðhaldi, fúa, þreytu, tæringu, sliti eða sambærilegum orsökum. Sama gildir um tjón sem rakið verður til hönnunargalla og/eða breytinga sem gera þarf á skipinu vegna hönnunargalla.
• Kostnað sem fylgir bótaskyldri tjónsviðgerð að því marki sem útgerðarmaður hefði sjálfur orðið að greiða hann fyrir eigin reikning vegna útgerðarinnar, viðhalds og/eða viðgerðar, ef hin bótaskylda viðgerð hefði ekki farið fram samtímis.
• Kostnað vegna yfir- og helgidagavinnu.
• Kostnað við að mála og hreinsa botn skipsins.
• Óbeint tjón, svo sem aflatjón og kostnað sem stafar af töf, sbr. þó gr. 16.5.
• Sektir og önnur refsiviðurlög.

Ábyrgðartrygging

Vátryggingin bætir:

• Tjón sem vátryggt skip veldur með árekstri og tjón sem verður á annan hátt vegna mistaka við stjórnun þess, enda sé um að ræða beint líkams- eða munatjón sem vátryggður veldur með saknæmum og ólögmætum hætti.
• Kostnað við að fjarlægja flak skips þriðja aðila.

Vátryggingin bætir ekki:

• Skaðabótakröfur frá starfsmönnum eiganda eða útgerðarmanns hins vátryggða skips, né skaðabótakröfur frá eigendum afla eða annars sem skipið flytur.
• Tjón þriðja manns vegna ábyrgðar vátryggðs á skemmdum munum eða glataðra muna sem vátryggður hefur að láni, á leigu, til geymslu, sölu, flutnings eða eru af öðrum ástæðum í vörslu hans, þar á meðal muna sem vátryggður hefur tekið í heimildarleysi.
• Sektir og önnur refsiviðurlög.
• Óbeint tjón, svo sem aflatjón og kostnað sem stafar af töf.