Valmynd Loka

Æfingaakstur er hugsaður sem viðbót við ökunámið sjálft en kemur ekki í staðinn fyrir ökutíma hjá menntuðum ökukennara. Honum er fyrst og fremst ætlað að þjálfa ökunemann til þess að hann öðlist meiri reynslu og færni í akstri.

Mikilvægt er að nota æfingaraksturstímabilið vel með því að aka reglulega með leiðbeinanda. Áður en æfingaakstur hefst þarf að taka Ökuskóla 1 og ákveðinn fjölda tíma hjá ökukennara. Fyrsta skrefið er því að finna sér góðan ökukennara.

Kröfur til leiðbeinenda
Sá sem tekur að sér að leiðbeina í akstri þarf að hafa náð 24 ára aldri. Hafa gild ökuréttindi til að stjórna þeim flokki ökutækja sem æfa á akstur með og hafa a.m.k. fimm ára reynslu af að aka þannig ökutæki. Hann má ekki, á undangengnum 12 mánuðum, hafa verið án ökuskírteinis eða verið refsað fyrir vítaverða aksturshætti á því tímabili. Sótt er um leyfi til leiðbeinendaþjálfunar til lögreglustjóra í heimabyggð viðkomandi á þar til gerðu eyðublaði. Ökukennari þarf að votta að nemandinn hafi öðlast nægilega þekkingu á umferðarreglum og þjálfun í stjórnun ökutækis til að æfa akstur með leiðbeinanda. Leiðbeinandinn þarf alltaf að hafa leyfisbréf fyrir þjálfunarakstri meðferðis og sýna það þegar og ef lögregla krefst þess. Þegar nemandi ekur með leiðbeinanda þarf bifreiðin að vera sérstaklega merkt með skilti sem á stendur "Æfingaakstur". Bifreiðin þarf að vera í fullkomnu lagi, hún skoðuð og ábyrgðartrygging þarf að vera í lagi. Leiðbeinandi þarf að afla sér sérstakrar staðfestingar hjá VÍS um að bifreiðin haldi ábyrgðartryggingunni, þrátt fyrir þessa notkun.

Ábyrgðin er leiðbeinandans
Leiðbeinandi telst lögum samkvæmt vera stjórnandi bifreiðarinnar með sama hætti og ökukennari. Til marks um það má geta þess að leiðbeinandi sem sinnir leiðsögn undir áhrifum áfengis sætir sömu viðurlögum og ef hann sæti sjálfur undir stýri á bifreiðinni.

Rifjaðu upp til öryggis
Leiðbeinandi þarf að kunna skil á námsefni ökunemans og kynna sér það sérstaklega áður en æfingaakstur hefst. Margt kann að hafa breyst í umferðarreglum og merkingum frá því leiðbeinandi tók ökupróf og því nauðsynlegt að fara vel yfir þau atriði. Auðveldasta leiðin til að afla sér þekkingar er að fara yfir námsefni ökunemans og kynna sér umferðarmerkingar eða fara á stutt upprifjunarnámskeið sem sumir ökuskólar halda. Þá viljum við benda leiðbeinendum á Bílpróf VÍS og aðra þætti hér á heimasíðunni þar sem fjallað er um umferðaröryggi.

Helstu atriði í æfingaakstri
Nauðsynlegt er að fara yfir öll stjórntæki bifreiðarinnar, stilla spegla og önnur öryggistæki, sæti og stýri áður en lagt er af stað. Minnt skal á að ökuneminn stjórnar nú bíl sem hann þekkir ekki og er frábrugðinn þeim bíl sem ökukennarinn leggur til. Nauðsynlegt er að yfirfara ljósker og glitmerki, athuga loftþrýsting í hjólbörðum og kanna hvort hemlabúnaður og stýri virki eðlilega. Mörgum leiðbeinendum finnst þægilegt að hafa viðbótarspegil svo þeir geti betur fylgst með umferðinni í kring. Eins getur verið gott að láta ökunemann prófa að aka sjálfskiptum bíl í einhver skipti.

Eftirfarandi atriði er æskilegt að farið sé yfir og æfð með ökunemanum:

  • Skipting og hemlun.
  • Bifreið tekin af stað í brekku.
  • Akstur aftur á bak.
  • Lagning í bifreiðastæði.
  • Ekið af stað og numið staðar.
  • Vinstri beygja af tvístefnuakstursgötu.
  • Vinstri beygja af einstefnuakstursgötu.
  • Akstur í hringtorgum.
  • Akreinaskipti.
  • Akstur á að- og fráreinum.
  • Framúrakstur.
  • Akstur í myrkri.
  • Akstur í hálku.
  • Akstur á malarvegi.
  • Staðsetning á akbraut og breidd ökutækis.
  • Hægri reglan.
  • Umferðarljós.
  • Umferðarmerkin.
  • Hjólandi og gangandi vegfarendur.
  • Forgangur strætisvagna.
  • Viðhorf og forvarnir.
  • Bakka með eftirvagn.

Afar mikilvægt er að leiðbeinandi sé góð fyrirmynd enda læra nýir ökumenn það sem fyrir þeim er haft. Brýna þarf fyrir ökunemanum að nota alltaf bílbeltið. Aka á löglegum hraða og sýna öðrum vegfarendum tillitssemi og virðingu í umferðinni. Ræða þarf ölvun við akstur og hættuna sem skapast af slíku athæfi.

Gefa þarf einfaldar og skýrar fyrirskipanir á rólegan og yfirvegaðan hátt. Æsingur og skammir bera ekki árangur en gera ökunemann þess í stað óöruggan sem getur haft áhrif á aksturshæfni hans.

Jákvæðni er lykilatriði
Varasamt og óæskilegt er að viðra neikvæðar skoðanir á umferðarmálum, umferðarmannvirkjum eða aksturslagi einstakra ökumanna. Ef ágreiningur er með leiðbeinanda og ökunema um einstök atriði er lúta að fræðslunni er rétt að hafa samband við ökukennarann til fá skorið úr deilumálinu. Góð þekking á umferðinni, umferðarreglum og umferðarmerkingum er forsenda þess að þjálfunin gangi vel. Illa upplýstur leiðbeinandi sem gefur rangar upplýsingar eða misvísandi er verri en enginn.

Eftir að hverjum æfingaaksturstíma lýkur er nauðsynlegt að ræða málin, þ.e. hvort eitthvað hafi farið úrskeiðis og hvað má betur fara. Ekki er æskilegt að farþegar séu í bílnum við æfingaakstur. Æfingaakstur með ungmenni krefst færni, þekkingar, þolinmæði og æðruleysis. Við skulum vera minnug þess að akstur er dauðans alvara og því afar mikilvægt að vel takist til.

Gátlistar

Fá til­boð Hafa samband
mail Hafa samband chat Netspjall
close

Tryggingar

Niðurstöður

Skjöl

Niðurstöður

Annað

Niðurstöður

Fréttir

Niðurstöður

Leit

Niðurstöður

Ææ en leiðinlegt!

Við fundum því miður ekki ""

Athugaðu hvort öll leitarorðin eru rétt skrifuð, annars geturðu prófað að víkka leitina með öðrum eða almennari leitarorðum.

Ef allt um þrýtur, endilega hafðu samband