Tvíkynjun

Það kemur fyrir öðru hvöru hjá húsdýrum og mannfólki að þau fæðast tvíkynja. Það er mjög sjalgæft en þó mismunandi á milli húsdýra. Til að rifja upp erfðafræðina þá eru kvenkyn XX og karlkyn XY og þegar er um sanna tvíkynju er að ræða verður svokölluð mosaik myndun á kynlitningum, blanda af XX og XY.

Þegar Hermaphrodismus eða tvíkynja á sér stað er yfirleitt truflun á þroska fóstursins snemma á fósturstigi. Oftast eru þessir einstaklingar annað hvort eins og hryssa í útliti en hegða sér eins og stóðhestur eða öfugt, eða phenotypan (útlit) er önnur en genatypan (innlit).

Tvíkynju er hægt að skipta gróft í tvo flokka:

• Sönn tvíkynja (Hermaphrodite), með eggjastokk og eistu. Blanda af XX og XY , kemur mjög sjaldan fyrir.
• Fölsk tvíkynja, er einungis með eggjastokk eða eistu, XX eða XY. Þannig að hryssan er eins og hryssa að öllu leyti nema hluti af kynfærunum (fyrir utan eggjastokka) er blanda af báðum kynjum.

Hryssa eða hestur?

„!Hryssan" sem ég fékk til skoðunar, gengur undir vinnuheitinu Tvítví, er 4 vetra og undan ættbókarfærðum foreldrum. Hún lítur út eins og venjuleg hryssa. Eigendur hennar fóru að gefa því gaum að hún var hörð í hryssum, smalaði þeim saman og reyndi að fara upp á þær, hagaði sér hreinlega eins og stóðhestur. Þegar menn fóru að fylgjast betur með henni tóku þeir eftir því að eitthvað stóð aftur úr skeiðinni sem var 4 til 8 sm á lengd. Þegar hryssan var skoðuð kom í ljós að snípurinn var umbreyttur í skaufalegan strúktúr með glans penis (kóng).

Þess má geta að þegar svona lagaðar breytingar eiga sér stað eru þessi blönduðu líffæri ekki í eðlilegri stærð, þannig að þarna virðist vera á ferðinni hrosss sem er með kynfæri frá karl- og kvenkyni. "„Hryssan" var sónarskoðuð og var eggjastokkur í eðlilegri stærð vinstra megin en allur út í litlum blöðrum, ólíkt venjulegum eggjastokk, og sá hægri var agnarsmár, ca. 2 sm. Til þess að reyna að komast að hinu sanna, hvort hér sé um sanna tvíkynju eða falska að ræða, er búið að taka blóð úr hrossinu í litningagreiningu og niðurstöður úr þeirri rannsókn og vonandi getum við birt niðurstöður ransóknarinnar í næsta blaði.