Vátryggingasvik

Vátryggingasvik kosta íslenskt samfélag háar fjárhæðir á hverju ári. Samkvæmt evrópskum rannsóknum má áætla að þau séu um 10% af greiddum tjónabótum. Ef miðað er við árið 2008 má álykta að vátryggingafélögin á Íslandi hafi greitt um 3 – 3,5 milljarð til einstaklinga og fyrirtækja sem áttu í raun ekki rétt á þeim bótagreiðslum.

Í vátryggingasvikum felst blekking. Viðkomandi aðili blekkir vátryggingafélagið til að greiða sér bætur sem hann á ekki rétt á.

Blekkingin varðandi atburðinn getur verið með ýmsum hætti:

• tjónsatburður gerðist aldrei
• hann var settur á svið
• hann átti sér stað áður en trygging var tekin
• hann var tilkynntur með röngum hætti svo atburður félli undir vátrygginguna

Blekkingin getur enn fremur varðað afleiðingar tiltekins atburðar:

• viðkomandi gerir sér upp einkenni
• hann segist vera óvinnufær en er samt í vinnu
• meiðsl eða tjón voru til staðar fyrir bótaskyldan tjónsatburð
• líkams- eða munatjón er ýkt

Langflestir viðskiptavinir eru heiðarlegir og krefjast aðeins bóta fyrir það tjón sem þeir hafa sannanlega orðið fyrir. Vátryggingafélag Íslands vill ekki að hinir heiðarlegu líði fyrir þá óheiðarlegu.

VÍS hefur sett sér stefnu varðandi vátryggingasvik og mun kappkosta að framfylgja henni. Einnig hefur verið komið upp tilkynningarhnappi á heimasíðu VÍS þar sem fólk getur komið á framfæri ábendingu um meint vátryggingasvik annað hvort undir nafni eða nafnlaust.