Farmtjón
Hagnýtar upplýsingar um viðbrögð fyrir þá sem hafa orðið fyrir farmtjóni.
Þegar vátryggingartaki fær vitneskju um tjón, eða að líkur séu á að tjón hafi orðið, er nauðsynlegt að ganga þannig frá málum að ekki hljótist meira tjón en þegar hefur orðið. Það ber að tilkynna VÍS um tjónsatburð við fyrsta mögulegt tækifæri og samhliða því þarf einnig að tilkynna farmflytjanda um tjón. Farmflytjandi er ábyrgur fyrir því tjóni sem hann hefur valdið. Ákveðnar reglur gilda um tilkynningu tjóns til farmflytjanda svo að ábyrgð haldist og eiga þær reglur stoð í lögum s.s. í lögum um loftferðir og siglingalög. Tilkynningafrestur um tjón til farmflytjanda er eftirfarandi svo ábyrgð hans haldist: Í sjóflutningi þrír dagar eftir afhendingu vöru, í flugflutningi sjö dagar og í landflutningi á að tilkynna um leið og vitneskja er um tjón.
Þau gögn sem vátryggingartaki þarf að framvísa vegna farmtjóns eru nokkur. Alltaf er beðið um afrit af farmbréfi til sönnunar þess að flutningur hafi átt sér stað og til staðfestingar á að viðurkenndur flutningsaðili hafi flutt vöruna. Til að staðfesta verðmæti vöru þarf að framvísa vörureikningi og tollskýrslu. Starfsmenn VÍS veita nánari upplýsingar um hvaða gögn þarf að útvega vegna farmtjóns.
Bótasvið
Farmtrygging bætir tjón á vöru í flutningi með viðurkenndum flutningsaðila. Almenna reglan er sú að vátrygging hefst þegar flutningsaðili hefur tekið við vöru og lýkur þegar hann hefur komið vörunni á áfangastað. Söluskilmálar og aðrir þættir hafa þó áhrif varðandi farmtryggingu og á eigandi vöru að kynna sér slíkt áður en farmtrygging er tekin, s.s. hvenær ábyrgð hans á vörunni hefst og/eða lýkur. Farmtrygging er skaðatrygging þannig að ekki er bætt afleitt tjón.
Mismunandi bótasvið eftir skilmálum
Bótasvið farmtryggingar er mismunandi eftir því hvaða skilmáli
gildir. Algengustu skilmálar eru A, B og C skilmálar í
farmtryggingum:
C skilmáli hefur oft verið nefndur "þröngur" skilmáli sem bætir hluti eins og sameiginlegt sjótjón, björgunarkostnað og altjóns á vöru þegar skip sekkur eða því hvolfir.
B skilmáli er oft nefndur "takmarkaður" skilmáli sem til viðbótar bætir tjón vegna fyrirborðsskolunar og altjón á einstaka einingum vegna upp- og útskipunar.
A skilmáli er víðtækur skilmáli og bætir hann hlutatjón á vöru, s.s. þjófnað og skemmdir vegna óhappatilvika í flutningi. Eins og komið hefur fram eru afleidd tjón aldrei bætt með farmtryggingu.
- Var efnið hjálplegt?
- Já
- Nei
- Gera athugasemd?
