Vatnstjón

Bótasvið

Heimilis- og húseigendatryggingar bæta tjón vegna vatns sem óvænt og skyndilega streymir úr leiðslum húsa og á upptök innan veggja þess. Ef vatnstjón hefur orðið af fyrrgreindum orsökum er nauðsynlegt að takmarka tjónið eins og kostur er. Það er ekki hægt að gera sér fulla grein fyrir því tjóni sem orðið hefur fyrr en réttu rakastigi er aftur náð í húsnæðinu.

Tjón vegna utanaðkomandi flóða, grunnvatns eða úrkomu bætist ekki, þó bætist tjón vegna úrhellis eða asahláku ef yfirborðsvatn er það mikið að frárennslisleiðir hafa ekki undan. Aldrei er bætt tjón vegna vatns frá þökum, þakrennum eða frá svölum.

Ef vatn lekur frá nágrannaíbúð getur komið upp flókið lögfræðilegt úrlausnarefni. Ef tjónið er vegna skyndilegs leka úr leiðslum bætir húseigendatryggingin tjónið sem verður á fasteign vegna þessa. Ef um er að ræða leka vegna vanbúnaðar eða viðhaldsleysis getur eigandi húsnæðisins orðið skaðabótaskyldur gagnvart þeim sem tjónið verður hjá. Húseigendatryggingin er með ábyrgðartryggingu húseigenda sem getur tekið til þessara mála, en þar sem skaðabótaábyrgð er oft flókið lögfræðilegt úrlausnarefni, ber vátryggðum að leita samráðs við VÍS um réttarstöðu sína ef gerð er krafa á hendur honum.

Í hverju vatnstjóni ber tjónþoli eigin áhættu sem er skráð í vátryggingaskírteinið. Auk þess ber honum að greiða fyrir hlutinn er olli tjóninu, svo sem rörin og vinnu við endurlögn eða lagfæringu þeirra.

Eru bótagreiðslur vegna eignatjóna skattskyldar?

Skaðabætur og vátryggingarbætur vegna tjóns á eignum sem ekki eru notaðar í atvinnurekstri teljast ekki til tekna með þeirri undantekningu þó að bætur fyrir altjón teljast söluhagnaður og skattleggjast samkvæmt því.